Friday, December 22, 2006

3 pems

കാന്തമെന്ന സൂത്രം

എന്തൊരു സൂത്രമീ കാന്തമമ്മേ
എന്തിലുമൊട്ടുന്നതെന്തു കൊണ്ടോ
ഏന്തിലുമൊട്ടുകയില്ല കുഞ്ഞേ
കാന്തമിരുമ്പിലാണൊട്ടിടുന്നു.
കുപ്പായക്കീശയിലെക്കുടുക്കില്‍
ഒട്ടുന്നതെങ്ങിനെ ചൊല്ലുകമ്മേ.
ആ ബട്ടണ്‍ തീര്‍ത്തതിരുമ്പിലാവും
ആകയാലൊട്ടുന്നു ശങ്ക വേണ്ട.

ഉറുമ്പിന്റെ അറിവ്‌

വരിവരിയായിച്ചുള്ളനുറുമ്പുകള്‍
മുട്ടയുമേന്തി പോകുമ്പോള്‍
പഴയവര്‍ പറയും മഴയുടെ വരവായ്‌
സംശയമില്ലയുറപ്പിക്കാം.
ഇങ്ങിനെ മഴയുടെ വരവറിയാനായ്‌
എങ്ങിനെ പറ്റുമുറുമ്പിന്ന്
കാലാവസ്ഥകള്‍ ശരിയായ്‌ പറയും
റേഡിയോ കയ്യിലിരിപ്പുണ്ടോ?

ചെമ്പോത്തിനോട്‌
കുറ്റിക്കാട്ടില്‍ മുളങ്കൂട്ടത്തില്‍
ചുറ്റിനടക്കും ചെമ്പോത്തേ
പൊത്തില്‍ത്തിരയുവതെന്താണ്‌
സ്വത്തോ, വിത്തോ, പറ മുത്തോ,
കാക്കകള്‍ തേടിയതൊക്കേയും
*കുമ്പളംചാത്തിക്കെന്നല്ലോ
പഴമൊഴി, അതിനാല്‍ തിരയുന്നേന്‍
പലവഴിയിങ്ങനെയെപ്പോഴും.
*ചെമ്പോത്ത്‌

Saturday, December 16, 2006

താരാട്ട്‌

താരാട്ട്‌

രാരിരം രാരിരോ രാരിരം രാരിരോ
രാരിരം രാരിരോ രാരിരാരോ
അമ്മുവുറങ്ങിയോ അമ്മുവെഴുന്നേറ്റോ
അമ്മു മാമുണ്ടുവോ പാല്‍കുടിച്ചോ?
വേറൊരു ചിന്തയുമില്ലിവിടാര്‍ക്കുമേ
വേറാരും വീട്ടിലില്ലാത്തപോലെ.
കാലത്തുണര്‍ന്നേറ്റാലപ്പോളെടുത്തിട്ടു
കാലിന്മേല്‍ നിര്‍ത്തി നടത്തുമച്ഛന്‍
കുപ്പായം മറ്റെടും പൗഡറും പൂശീടും
അല്‍പ്പമായുള്ള മുടിയും ചീകും.
വയ്യെങ്കിലും കൂടെ പന്തു കളിക്കുവാന്‍
തയ്യാറാണമ്മമ്മ മുത്തശ്ശനും.
അമ്മാവനാണെങ്കിലെപ്പോളും തോളത്തു
ചുമ്മീടുമുപ്പിന്റെ ചാക്കുപോലെ.
മറ്റുള്ളോരെന്തൊക്കെത്തന്നാലുമമ്മുവി-
ന്നിഷ്ടമൊന്നമ്മ കൊടുക്കും പാല്‌
എല്ലാര്‍ക്കുമിഷ്ടമാണമ്മുവെ, യമ്മുവി-
നെല്ലാറ്റിലുമിഷ്ടമച്ഛനമ്മ.